Un pensiero sulla separazione delle carriere scritto in ligure

Primma de mettime aproevo a scrivê ’sto pensceo, me ghe son appensòu ben e ciù de uña votta, e in scia a fin ò deçiso de fâlo in ta a lengua d’origine do pòpolo abitante in te ’sta zona, saieiva a dî in to “spasio de reflescion pe-a Liguria e dintorni”, comme se leze in to scito d’i Trucioli Savonesi. Me perdoniâ chi o no l’è nasciuo in te ’sti posti, ma gh’è chi dixe che in ta lengua do cheu se peu scrivê e parlâ de tutti i argomenti che se veu.

Quest’argomento o l’è importantiscimo e popolariscimo, dæto che o referendum o l’è un instituto de democraçia diretta e che de chi a un pö saiemu ciammæ a esprimmise in sce ’sta reforma constituçionale. Saiâ façile ch’o referendum o ghe saiâ za in ta primmaveia. Emmo alloa da començiâ a fäse unn’idea in propoxito. Arregordemmose ascì che in to referendum constituçionale o quorum pe esê valido o no gh’è, donca anche s’anessan a votâ in te dexe e sei votanti marchessan o NO, a leze de reforma a no passieva.

Cose dî, alloa, d’a riforma d’a Constituçion appeña aprovâ in to Parlamento?

Primma de tutto inandiemmoçe a esê sottomissi a de campagne mediatiche çentræ in sci erroî giudiçiäi. Battian a ciù no posso (comme di ferræ) in sce e magagne da giustiçia, per creâ un climma contraio a-a Magistratua. Nisciun, meno che pöchi, o se preoccupiâ de fâ de l’informaçion vea: ascistiemo a tanta pua in ti euggi e a pöchi raxionamenti. Mi çerchiô alloa de evitâ çerti TG, strisce televisive, aradio, çerta stampa e sciti varri che ciù che informâ, confondan (saieva megio dî “abbeliñan”) a çittadinansa. Tutta l’ “informaçion” do genere in te uña sola pòula a se ciamma propaganda.

Beseugna avei ben presente, primma de tutto, cose o l’è un pubblico ministero (PM). Semmo tutti d’accordio ch’o l’è un magistrato independente ch’o pòrta avanti l’açion penale e defæti o se ciamma Procoratô d’a Repubrica. In to scistema giuridico italian l’açion penale a l’è un ben pubblico, coscì pensòu pe tutelâ i çittadin e propio pe questo a Constituçion a veu l’independença d’i PM. A mainea do PM de condue l’açion penale, o porieva esê un tema da desviluppâ in te unna proscima reflescion.

A-o momento tutti i magistrati italien forman un’unica magistratua, che seggian giudicanti (i giudici) o requirenti (i PM) e gh’an un solo òrgano de autogoverno, logicamente independente, ciammòu Conseggio Supeiô da Magistratua (CSM).

Beseugna savei ascì che a-a giornâ d’ancheu, magistrati che passan d’a fonçion requirente a quella giudicante o a-a reversa, se contan in sce e die de uña man. Specialmente a partî da-o 2022 dæto che in ta reforma Cartabia o l’è stæto stabilio che ’sti passaggi de fonçion se peuan fâ solo uña votta in tutta a carriera e cangiando corte de assegnaçion.

A domanda che unna persoña media comme mi a se fa subito a l’è a seguente: poscibile che pe dexe o vinti passaggi de fonçion a l’anno in sce 9.600 magistrati se fasse unna reforma d’a Constituçion?

A domanda a l’è retorica e di fæti o no poe esê poscibile: a mi me convinçan molto de ciù e pòule d’o magistrato Cesare Parodi che veuggio reportâ a-a lettia: la riforma proposta è, indirettamente ma non per questo meno efficacemente, un attacco all’indipendenza della magistratura (Genova24 del 13 novembre 2025, Università di Genova gremita per il dibattito sull’indipendenza della magistratura, il procuratore Gratteri ribadisce il suo No alla separazione delle carriere).

Liatri (o Governo) dixan ch’a le unna costion de prinçipio, dovua a-a tersietæ do giudice e che, anche ’sta votta pe liatri, chi o fa o PM no porieiva esê terso se o se faxesse giudice. Mi diggo che a primma costion de prinçipio a l’è quella de no modificâ a Constituçion a maggiorança. A Constituçion a l’è de tutti e no solo do Governo. Za solo che pe questo besurieiva votâ un bello NO.

A costion vea me pâ ch’a segge quella do controllo do PM e de l’açion penale. Liatri (o Governo) dixan che l’articolo 104 primmo còmma (La magistratura costituisce un ordine autonomo e indipendente da ogni altro potere), o no vegne toccòu. Mi penso che s’aniâ avanti a un passo pe votta: mettian in futuo o PM sotta a-o controllo do Governo? Tornemmo a-a domanda iniziale: poscibile che fassan tutta ’sta reforma pe pinçipio quande ghe meno de vinti passaggi in sce 9.600 Magistrati? Pâ strano. A l’osso, a costion a l’è questa e pe questo mi son contraio a-a separaçion de-e carriere.

A reforma do Conseggio Supeiô da Magistratua poriâ esê l’argomento da proscima votta. Me perdonian i Savoneixi se ò scrito in zeneize.

Salui a tutti

FABIO